وكأني وكأنك حلم
أخر حلم متعلق في سحابه
من أحلام الجدود
وكأني وكأنك
جزء من ماضي موروث لحاضر
تاه من غير حدود
الزمن كان ما بينـّا
أسطوره من غير ملامح
فيها الغياب سارح بالعقول
تمد حبل الوداد للشمس
يمكن تنسي الأمس
تلقي المسافة ما بينك وبين الجرح
نظره
مجرد نظره
تسرقها لمرايه
تشوف ملامح الأنا فيها
شكل تاني
لون الثواني
يرسم تجاعيد
ويترك اثر
ويسيب الحلم
من غير مسار
لان الضلال واقف وسط الطريق
يقسّم المشهد
وتفاصيل القتيل
من غير جسد
من غير كفن
من غير دليل
ويرمي الليل بقاياه
في حضن أفعى
فيطلع نهار مسموم
تلقي نفسك
شبح بيعربد في غيمة هموم
أو بتابوت محكوم
تصرخ تثور
وتمد الدراع
يمكن تلمس شراع الأمل
تلقي الأمل موصوم
ما فيش رجوع
وشم بيه مختوم
شيء حقير إن يموت الضمير
وقت المحن
وأنت اللي عاشق حلم الوطن
وأنت الضرير وسط النور
وأنت اللي فاهم ومش فاهم
أزاي تعلي القصور
وأنت الحر ..سجنك سور
وأنت التاريخ اللي ضاع
بخربشات النسور
أزاي تغير ملامحك بين الفصول
والسجن والسجان
بيحقـَّر في العقول
والجهل صاب
أصل المصاب
في لحظة جوع تفزعك
في خوف من فقر يوجعك
في كلمه بحكمة تجمعك
تلقي كذبه
للبداية تاني ترجعك
لعبه من العاب الحواة
ولأني ولأنك حلم
أخر حلم متعلق في سحابه
من أحلام الجدود
بنثور
هدي نور
